ԱՊԱԳԱ Ծրագիր

Դիլիջան  քաղաքում  կա  «Ռադիոտեխնիկումի»  տարածք,  շրջապատված  ոչ  մեծ  դաշտով,  որտեղ  մենք  անց  ենք  կացրել  մեր  ողջ  մանկությունը՝   ֆուտբոլ  խաղալով  և  հեծանիվ  քշելով…  «Ռադիոտեխնիկումի»  շրջակայքը՝  ներառյալ  «տնկարանը»  (ոչ  մեծ  անտառակ  լանջին),  «Ապագա»  երկրի  «քաղաքային»  մասն  է:  Այն  կոչվում  է  «Դաշտ»:   

Ինչպես  յուրաքանչյուր   երկիր  (խուսափելով  քաղաքական  մեղադրանքներից՝   մենք  չենք  օգտագործում  «պետություն»  բառը),  «Ապագան»  կարիք  ունի  ոչ  միայն  քաղաքի,  այլև   գյուղի,  գյուղատնտեսական  տարածքների,  որսարանների  և  զբոսավայրերի:  Այդ  հողերը  կենտրոնացված  են  Ենոքավան  գյուղի   շրջակայքում,  այն  գտնվում  է  Դաշտից  40  կիլոմետր  հեռավորության  վրա  (ավտոմայրուղով):

Եթե  նախընտրում  եք  քայլել  ոտքով,  լեռնային  գեղեցկագույն  արահետներով,  ձեզ  կհաջողվի  այդ.  «Ապագայի»  քաղաքային  և  գյուղական  հատվածները  կապված  են  15  կիլոմետրանոց  ազատ  քայլքի  և   ակտիվ  հանգստի  գոտիով:  

Մյուս  էջերում  Արտաշ  պապը  կպատմի  Ենոքավանի  մասին:  Ինչպես  յուրաքանչյուր  պատմություն, Արտաշ  պապի  պատմությունը  չի  հավակնում  բացարձակ  ճշմարտություն  լինելուն:  Այն պատմություն  է  ըստ  նրա  սեփական  շարադրանքի: Մենք  հաճույքով  կտպագրենք  Ենոքավանի  պատմության  ձեր  շարադրանքը:  Մի  քննադատե՛ք,  այլ  գրե՛ք: 

Մոռացա:  «Ապագա» երկրում չկան ոստիկաններ, թիկնապահներ, քննադատներ:

Այստեղ  ապրում  են  մարդիկ,  որոնք  բարձր  են  գնահատում իրենց  անձնային  ազատությունը  և  հետևաբար,  հարգում  են  այլոց  ազատությունը:  Ապրի՛ր  ազատ   և  մի  խանգարի  ուրիշներին  ապրել  ազատ: